donanma
Gel deniz yüzlerini kâfire teng eyleyelüm,
Sayhâ-i top ile dem-beste vü deng eyleyelüm,
Allah Allah diyü gülbang ile ceng eyleyelüm,
Gel Donanma'ya gidüp azm-i fireng eyleyelüm..
Şâh-ı gâzinün olupdur çü gazâ matlûbı,
Kâfire gönderelüm saikalarla tobı,
Çalalum Malta ile Baskana'ya aşubı,
Gel Donanma'ya gidüp azm-i fireng eyleyelüm..
Nehb ü gâretler ile Pulya'yı vîran idelüm,
Geçüp andan öte İspanya'yı tâlân idelüm,
Ceneviz memleketin hak ile yeksân idelüm,
Gel Donanma'ya gidüp azm-i fireng eyleyelüm..
Allah Allah diyü engine donanma salalum,
Portukal memleketin Südde'ye varup alalum,
Feth ü nusretler olup tabl-ı beşaret çalalum,
Gel Donanma'ya gidüp azm-i fireng eyleyelüm..
Kâfire gâret içün doğrılalı dümenler,
Gemiler forsa yüzer, dorıdadur yelkenler,
Yelteyüp birbirini cûşiledir görenler,
Gel Donanma'ya gidüp azm-i fireng eyleyelüm..
Nûh evin eyleyeli lütf-i Hüdâ meskenümüz,
Rüzgâr oldı muvâfık, dolıdur yelkenümüz,
Gâzîler bu yola cân ile tutup gerdenümüz,
Gel Donanma'ya gidüp azm-i fireng eyleyelüm..
Şeş-cihata bu murabbâ salup âvâz-ı bülend,
Atdı nusretler ile kal'â-i efrence kemend,
Ey Yetîm ister isen olmağa bir şâh-levend,
Gel Donanma'ya gidüp azm-i fireng eyleyelüm..